தாய் தந்தையின் நிலை, தந்தை தாய் வழி முன்னோர்கள்; ஒருவரின் கடந்த பிறவியில் செய்த நன்வினை, தீவினை கர்மா பற்றிய விதியை தெரிவிப்பதாகும்.

துவதசாம்சத்தின் லக்னாதிபதி இவ்வுலக வாழ்க்கையின் நிகழ்காலத்தையும், வருங்காலத்தை 9ஆம் பாவமும் , சென்ற பிறவியின் பலனை12ம் பாவம் மூலமும் உணர்த்துவதாகும்.

இதில் சூரியன், சந்திரன், சனி, 12-ஆம் பாவ அதிபதி ஆகியோர் முக்கிய பலனைத் தருவதாக கொள்ளலாம்.

தாய்க்கும், தந்தைக்கும் சந்திரன், சூரியன் இயற்கைக் காரர்கள். தந்தை வழி முன்னோர்களுக்கு குருவும், தாய்வழி உறவிற்கு புதன் என்றும் கூறப்பட்டுள்ளது.

தற்காலத்தில் – ராகுவை தந்தை வழி பாட்டன், பாட்டி எனவும், கேதுவை தாய்வழி பாட்டன், பாட்டி எனவும் கூறுகின்றனர்.

ஸ்தானங்கள்: லக்னம் / சூரியனுக்கு 9-ம் இடம் தந்தையைப் பற்றியும், லக்னம் / சந்திரனுக்கு 4-ம் இடம் தாயாரைப் பற்றி அறியும் விதியாகும்.

சூரியனுக்கு 12ம் இடம் [ ஒன்பதாம் இடத்திற்கு 4-ஆம் இடம் ] மூலம் தந்தை வழி பாட்டியைப் பற்றியும், தாய்வழிப் பாட்டி பற்றி அறிய சந்திரனிலிருந்து 7-ம் இடம் கொண்டும் அறியலாம்.

இந்த இடங்களுக்கு 2 மற்றும் 7மிடம் மாரக ஸ்தானங்கள் ஆகும்.

எனவே, மாரக ஸ்தானத்தில் இருக்கின்ற கோள்கள் அல்லது மாரக ஸ்தான அதிபதிகளின் திசை நடந்தால், மேற்கண்ட உறவுகளுக்கு மாரகம் ஏற்படலாம்.

துவதசாம்சத்தின் விதிகள்:

1. லக்னத்திற்கு 12-ல் சந்திரன் இருப்பது தாய்க்கு நன்மை தராது. இளமையில் தாயை பிரியும் நிலை ஏற்படும். அல்லது தாயாரல் நன்மை பெற இயலாது.
2. சூரியன் 6 – 8 – 12 ல் இருந்து பாதிக்கப்பட்டிருந்தால் தந்தையின் உறவு பாதிக்கப்படும்.
3. சூரியன் 6 – 8 – 12 ல் இருந்து அல்லது அதன் அதிபதிகளுடன் சம்பந்தம் ஏற்பட்டு, சந்திரன் – தனுசு ராசியில் இருந்தால், தான் பிறக்கும் முன்பே தந்தையை பிரித்து விடுவார் – பிரிந்து விடுவார்.
4. ராசியில் சந்திரன், புதன் இணைந்திருந்தாலும், சம சப்தமாக இருந்தாலும் ஜாதகரின் தந்தை இரண்டு திருமணம் செய்து கொள்வார். அல்லது வேறு ஒரு பெண்ணுடன் தொடர்பு கொண்டு இருப்பார். அவர்களுடன் ராகு, கேது தொடர்பு பெறுமானால், கலப்புத் திருமணமாக அமையும்.
5. துவதசாம்சத்தில் சந்திரன் + கேது தொடர்பு – தாய்க்கு முன் தந்தை இறந்துவிடுவார்.
6. சூரியன் + ராகு சம்பந்தம் தந்தை மனைவியை இழந்து விடுவார்.
7. பொதுவாக ஒன்பதாம் பாவம் தரும் பலாபலனை இதன் மூலம் அறியலாம். [ ஆன்மீக உணர்வு, தெய்வ பக்தி, மத நம்பிக்கை, மதம் மாற்றம், அயல் நாடு செல்லும் யோகம், தனது செயலால் செய்யும் சாதனை, உயிருடன் இருந்தாலும் அல்லது இறந்தாலும் – தன் பெயரைச் சொல்லும் தகுதி / சாதனைகள் / திறமை பற்றி அறியலாம். 9-ம் பாவம் & அதிபதி பலம் பெற்றிருந்தால் தான் மேற்குறிப்பிட்டவற்றை அனுபவிக்கலாம். ]
8. ஒன்பதாம் பாவமும் அதன் அதிபதியும் பலம் பெற்றால், அதாவது கேந்திர திரிகோணங்க்களில் அமர்ந்திருப்பது அல்லது 2 – 11 ல் இருப்பது நன்மை தரும். மாறாக, 6 – 8 – 12ல் இருந்தால் நன்மை குறைவாகும்.

துவாதசாம்சம் என்பது துரியாம்சம் என்றும் கூறப்படும்.

ராசியின் பனிரெண்டாம் பாவத்தின் விரிவாக்கம் துவதசாம்சம் ஆகும்.

ஒரு ராசியில் உள்ள 30 பாகையை 12 சம பிரிவுகளாக பிரிக்க – ஒரு பிரிவிற்கு 2 டிகிரி 30 கலை [ 2.30 டிகிரி ] ஆகும்.

ராசியில் கிரகம் எந்த இத்தில் இருக்கிறதோ, அந்த இட த்தில் இருந்து ஆரம்பித்து வரிசையாக – 12 பிரிவில் எந்த பிரிவில் வருகின்றதோ – அங்கு நிரப்ப வேண்டும்.